“Bu gün bütün müsəlman aləmi mənəvi paklıq, mərhəmət, paylaşmaq və yardımlaşmaq kimi ən ali insani dəyərləri özündə cəmləşdirən müqəddəs Ramazan bayramını böyük sevinc və qürur hissi ilə qeyd edir.Ramazan ayı hər birimiz üçün səbrin, şükrün, nəfsə qalib gəlməyin, ruhən saflaşmağın və Allaha daha da yaxınlaşmağın bir məktəbi oldu. Bu ay ərzində tutulan oruclar, edilən dualar, göstərilən mərhəmət və ehtiyacı olan insanlara uzadılan yardım əlləri cəmiyyətimizdə birlik, bərabərlik və qardaşlıq duyğularını daha da gücləndirdi.

Ramazan bizə yalnız ac qalmağı deyil, həm də başqalarının halını anlamağı, kasıblara, kimsəsizlərə və ehtiyacı olanlara dəstək olmağı öyrətdi. Bu müqəddəs ay insan qəlbini kin və nifrətdən uzaqlaşdıraraq sevgi, ümid və mərhəmətlə doldurdu. Bu gün isə bütün bu gözəl dəyərlərin zirvəsi olan bayram gününü yaşayırıq.

Bu əziz bayram münasibətilə arzu edirəm ki, hər bir evə sevinc, hər bir süfrəyə ruzi-bərəkət, hər bir qəlbə isə nur və rahatlıq dolsun. Qoy küsülülər barışsın, uzaqlar yaxın olsun, dualar qəbul, niyyətlər gerçək olsun. Qoy bu bayram həm ölkəmizə, həm də bütün dünyaya sülh, əmin-amanlıq və firavanlıq gətirsin.

Xüsusilə ehtiyacı olan insanları unutmayaq, sevincimizi onlarla bölüşək, çünki bayramın əsl gözəlliyi paylaşdıqca artır. Gəlin bu müqəddəs günlərdə bir-birimizə daha çox dəstək olaq, yaxşılıq etməyi həyatımızın ayrılmaz bir hissəsinə çevirək.

Bayramınız mübarək!
Allah tutduğunuz orucları, etdiyiniz duaları, verdiyiniz sədəqələri və bütün xeyirxah əməllərinizi qəbul etsin. Qoy Uca Allah hər zaman sizi və ailənizi qorusun, qəlbinizə iman, evinizə bərəkət, həyatınıza isə xoşbəxtlik və uğur bəxş etsin!”

Lamiyə Əliqızı
Xeber.info-un baş redaktoru