Bir neçə gün bundan öncə Zaqatalada fəaliyyət göstərən Xəqani Psixoloji Reabilitasiya Mərkəzində 3 yaşlı uşağın döyülməsi ilə bağlı ölkə mətbuatında video yayılmışdı. Həmin video yayılarkən məqsədli şəkildə montaj edilmiş və mərkəzin fəaliyyətini sual altında qoymaq məqsədi daşıyırdı. Məsələ ilə bağlı mərkəzdə müalicə alan bir qrup valideynlərlə görüş keçirmişik. Valideynlərin sözlərinə görə, görüntülər sürətləndirilmiş şəkildə yayımlanıb: “Hadisə iyul ayında baş verib. Bura şəhidin adını daşıyan mərkəzdir. 6 il ərzində əsla belə bir halla qarşılaşmamışıq. Uşaq bizim mərkəzdə 8 ay müalicə alıb. Daha sonra evdə yanıq xəsarətləri aldığı üçün mərkəzimizdə müalicəyə davam etmədi. Amma onu da deyək ki, uşaq artıq sağalmışdı. Valideynin təşəkkür videoları da var. İndi belə bir addım atmasına səbəb isə bizdən tələb etdiyi pulu ala bilməməsidir. Uşağını sağaltdığımız halda mərkəzimizdən pul tələb edir. Video sürətləndirilib. O görüntülərin əsli bizim əlimizdədir və ölkə mətbuatında yayımlanıb. Müəllimə kameranın altında oturub necə belə bir şey edə bilər axı? Biz heç məsələni araşdırmadan şiddət məsələsini eşidən kimi o müəllimi işdən uzaqlaşdırdıq. Lakin daha sonra 21 valideyn mərkəzimizə gəlib bizdən tələb etdi ki, müəllimi işə qaytaraq. Buna səbəb isə onun həmin valideynlərin övladlarını müalicə edib sağaltması olub. Bütün bunlar şər-böhtandır”.
Xəqani Nitq Reabilitasiya Mərkəzi qəhrəman şəhid leytenant Xəqani Məmmədovun bacısı psixoloq Sevinc Məmmədova tərəfindən xeyriyyə və şəfa vermək həmçinin şəhidin adını yaşatmaq üçün təssis olunub. Xatırladaq ki, qəhrəman şəhidimizin şəhadətindən sonra valideyinləri infakt, bacısı isə insuld keçirib və Sevinc xanım məhz həmin dönəmdə qəhrəman qardaşının adını uca tutmaq məqsədi ilə 50 təhsilli gənci mükəmməl mütəxəssis kimi yetişdirib, çörək verəcəyinə and içib. Sevinc xanım bu əhdini hal-hazırda həyata keçirir. İkinci Qarabağ müharibəsindən sonra isə onlarla qazi və veterana tam təmənnasız yardım göstərib. Bunu isə heç bir mətbu orqanda yayımlamayıb. Sevinc Məmmədova bu xidməti öz bacılıq borcu adlandırır və daim şəhid, veteran, qazi ailələrinə maddi, mənəvi yardımda iştirak edir. Hal-hazırda isə Şəhid qardaşının adına olan mərkəz xidməti göstəricilərinə görə, öndə gedən ən güclü müəssisələrdən biridir!
Ona görə də əsassız və qərəzli məlumatlarla ictimai fikri çaşdırmaq yolverilməzdir və Azərbaycan Respublikasının qanunvericiliyinə ziddir. Ona görə də haqqımızda əsassız informasiyalar yayan belə mətbu orqanlarla bağlı tərəfimizdən lazımi ciddi hüquqi tədbirlər həyata keçirilir və onların ciddi cəzalanması üçün hüquq-mühafizə orqanlarına və müvafiq məhkəməyə müraciət prosesi artıq başlamışdır.
Hesab edirik ki, bu mətbuat orqanları saxta reytinq toplamaq məqsədilə ölkəmizin tanınmış şirkəti haqqında əsassız məlumatlar yaymaqdansa, səmərəli fəaliyyət göstərib obyektiv və qərəzsiz informasiya yaymaqla ölkəmizin inkişafına xidmət etməlidirlər. Mərkəzimizə onlara bu cür xəbərləri sifariş verənlər də məlumdur. Unutmasınlar ki, onlar da bu fəaliyyətləri ilə heç də dövlətçiliyimizin möhkəmlənməsinə xidmət etmirlər və qanuna zidd hərəkətlərinə görə məsuliyyət daşıyırlar.
Azərbaycan Respublikasının Prezidenti cənab İlham Əliyev ölkəmizdə söz, fikir və mətbuat azadlığı üçün bütün lazımi şəraiti yaradıb. Bu gün Azərbaycanda mətbuat tam azaddır. Təəssüf ki, bəzi kütləvi informasiya vasitələri bu azadlıqdan sui-istifadə edir, öz çirkin məqsədlərinə nail olmağa, yalan, qərəzli və əsassız məlumatlarla ayrı-ayrı şəxslərin və şirkətlərin nüfuzuna ziyan vurmağa çalışır və bununla, əslində, söz və fikir azadlığına böyük zərbə vururlar.
Bu cür "mətbu orqanların" ölkəmizin tanınmış və uğurla inkişaf edən mərkəzinin nüfuzunu aşağı salmağa göstərdikləri uğursuz cəhdlərin heç bir əsası yoxdur və bütün bu addımlar "Kütləvi informasiya vasitələri haqqında" Azərbaycan Respublikasının Qanununa tam ziddir. Hesab edirik ki, hüquq-mühafizə orqanları və digər müvafiq qurumlar şirkətin və onun rəhbərinin işgüzar nüfuzuna xələl gətirən bu cür cızma-qaraların müəllifləri barədə müvafiq ölçü götürməli, onları qanunun tələblərinə uyğun olaraq ciddi şəkildə cəzalandırmalıdırlar. Bu cür hallara qarşı vaxtında mübarizə aparılmaması isə onunla nəticələnir ki, milli sahibkarlığımızın simalarından olan tanınmış şirkətlərin uzun illərlə böyük əziyyətlə nail olduğu işgüzar nüfuz bir qrup mətbu orqanlarda çalışan bəzi cızma-qara müəlliflərinin qərəzli fəaliyyətləri sayəsində zədələnir.
Xüsusilə qeyd edək ki, mərkəzdə müalicə alan uşaqların valideynləri rəhbərliyin qəbuluna gələrək etiraz ediblər və müəllimənin işə bərpasını Sevinc xanımdan xahiş ediblər. Hətta qəbulda olarkən mərkəzin rəhbərliyinin diqqətinə çatdırıblar ki, şər və böhtan xarakterli video paylaşmış valideynlə bağlı məhkəməyə müraciət edəcəklər.