Hava Nəqliyyatında Baş Gömrük İdarəsinin əməkdaşları xeyli miqdarda mobil telefonun gömrük sərhədindən düzgün bəyan etmədən keçirilməsi cəhdinin qarşısını alıblar.
xeber.info Trend-ə istinadən xəbər verir ki, DGK-dan verilən məlumata görə, Dubay-Bakı aviareysilə gələn Azərbaycan vətəndaşı gömrük nəzarəti zonasına daxil olarkən üzərində 4 ədəd "İphone X” markalı mobil telefonun olması barədə sadələşdirilmiş bəyannamə tərtib edib.
Lakin vətəndaşın əşyaları rentgen aparatıyla yoxlanılarkən monitorda daha çox mobil telefonun təsviri görünüb. Bu səbəbdən həmin şəxs saxlanılıb və əşyaları təkrar yoxlanılıb.
Nəticədə, vətəndaşa məxsus çamadanda əvvəlcədən gömrük nəzarətinə düzgün bəyan edilməyən 10 ədəd, paketin içərisində isə 2 ədəd "İphone X 256GB” markalı mobil telefonlar aşkar olunub.
Faktla bağlı araşdırma aparılır.
