Abşeron rayonu Təcili Tibbi Yardım Xidməti ilə bağlı şikayətlərin ardı-arası kəsilmir.

Xırdalan əhalisi 30 il əvvəlki 3 briqadanın ümidinə qalıb. Bu say isə xəstələrin çağırışlarına kifayət etmir. İddialara görə, briqadaların sayı son illərdə artırılmayıb. Təcili tibbi yardım maşınlarının çağırılan ünvana vaxtında çata bilməməsinin əsl səbəbi də məhz budur. Ötən gün bu vəziyyətlə daha bir Xırdalan sakini üzləşib. Abşeron rayon Təcili Tibbi Yardım Stansiyasında xəstəyə göndərməyə maşın tapılmayıb. Cebhe.info xəbər verir ki, bu barədə jurnalist Famil Fərhadoğlu məlumat verib.

Həyat yoldaşı ilə bağlı Abşeron rayonu Təcili Tibbi Yardım Xidmətindən çağırış edən jurnalist xəstənin həyatına biganə qalan Təcili Tibbi Yardım stansiyasının əməkdaşlarının cəzalandırılmasını istəyib. Həmçinin tibbi personalın laqeyd münasibəti ilə bağlı Səhiyyə Nazirliyinə də müraciət edib:

"Dünən saat 22:26 radələrində həyat yoldaşım antibiotik dərman qəbul etdiyi üçün allergik reaksiya ilə üzləşib. Kəskin tənəffüs çatışmazlığı, ürək döyüntülərinin artması və əllərinin qıc olması ilə bağlı səhhətində problem yaranmışdı. Xırdalan şəhərində kirayədə yaşadığım üçün ərazi üzrə Abşeron rayon Təcili Tibbi Yardım stansiyasına zəng etdim. Xəstəyə qarşı gördüyüm biganə münasibət məni sarsıtdı. Dispetçer həkimə dərdimi deyirəm, o da yanındakılardan soruşur. Bu bir tərəfə, dəstəyi götürən digər xanım işçi hazırda maşınların çağırışda olduğunu bildirərək çox rahatlıqla “maşın yoxdur, özünüz xəstəni aparın” dedi. Hətta təcili olaraq xəstəni Akademik Mirqasımov adına Respublika Klinik Xəstəxanaya aparmağımı məsləhət bildi. Xəstəni taksi ilə deyilən xəstəxanaya çatdırdım. Orada da xəstəyə biganə münasibətin şahidi oldum. Hər tibb işçisi bir söz deyərək, “əlil arabası ilə xəstəni reanimasiyaya aparın” deyə göstərişlər verir. Liftə minəndə xanım işçi “sizə burada yardım göstərə bilməyəcəklər, ən yaxşısı Kliniki Tibbi Mərkəzin Toksikologiya şöbəsinə müraciət edin” deyə bildirdi. Yenidən taksi tutub (xəstəxananın həyətində təcili tibbi yardım avtomobili olduğu halda) deyilən xəstəxanaya getdim. Sağ olsunlar ki, Kliniki Tibbi Mərkəzin Toksikologiya şöbəsində lazımı tibbi yardım göstərildi. Həmin vaxt üstümdə pul olmaya da bilərdi. Xəstəmi necə xəstəxanaya aparacaqdım, yaxud vaxtında çatdıra bilməsəydim, necə? Vətəndaşa qarşı bu, necə biganə münasibətdir?” deyə jurnalist əlavə edib.

Qeyd edək ki, jurnalist bu gün üzləşdiyi problemlə bağlı Səhiyyə Nazirliyinin 9103 "Qaynar xətti"nə zəng edərək, məlumat verib:

“Məsələni araşdıran xidmət qurumundan mənə bildirilib ki, həmin həmin vaxt Abşeron Rayon Təcili Tibbi Yardım Xidmətində maşın olmayıb. Sonradan guya mənə zəng ediblər və mən Təcili Tibbi Yardım maşınından imtina etmişəm. Halbuki elə bir məsələ olmayıb. Xahiş edirəm, həmin təcili tibbi yardım stansiyasının vətəndaşa laqeyd yanaşan tibbi personalı cəzalandırılsın".

Abşeron Şəhər Mərkəzi Xəstəxanasının baş həkimi Mehriban Qaralova Cebhe.info-ya açıqlamasında qeyd edilən iddialarla razılaşmayıb. O deyib ki, Xırdalanda kifayət qədər Təcili Tibbi Yardım Xidməti briqadası fəaliyyət göstərir:

“Hazırda 20-yə yaxın briqada bütün Abşeron boyu xidmətdədir. Əvvəllər say baxımından çox ciddi olmasa da, problemlər olurdu. Amma son 3 ildə briqdalarımızın sayını artırdıq. İndi bu sahədə hər hansı şikayət yoxdur. Bütün Abşeron rayonuna bizə Bakıdan olan təcili tibbi yardım stansiyaları xidmət göstərir. Bizdə heç bir problem yoxdur. Elə olur ki, ünvanı düz demirlər, hətta əsassız çağırışlar da olur. Hər halda biz araşdıracağıq, siz narahat olmayın. Biz rəsmi müraciət edin, araşdıraq. Mən də bu işdə maraqlıyam. Biz qüsurlarımızı bilməliyik. Bəs mən qüsuru kimdən öyrənim, kimdən bilim? Vətəndaşların məmnunluğu bizim üçün ilk yerdə durur”.