Bakının Tbilisi prospekti, 3007-ci məhəllə 44 C ünvanında yaşayan çoxmərtəbəli binanın sakinləri həmin binanı təhvil vermiş “Tac Mahal MTK”dan ciddi narazılıqlarını ifadə ediblər.

Bir neçə şikayətçi sakinin adından bizə müraciət edən Ağalar Cavadov adlı vətəndaş deyir ki, onlar, demək olar, barıt çəlləyinin üstündə yaşayırlar: “İnanın ki, müraciət etmədiyimiz instansiya qalmayıb. 11-12 ildir bina təhvil verilib, amma şirkət üzərinə düşən heç bir öhdəliyi yerinə yetirmir. Biz hələ də “kupça”larımızı ala bilmirik. Bütün liftlər qəzalı vəziyyətdədir. Binaya suyun verildiyi baseynlər hər il yuyulub təmizlənməli olduğu halda, 12 ildir təmizlənmir. 296 mənzilli bina böyük bir kənd deməkdir. Bunu tikib, 4 divarı verməklə deyil ki, gərək idarə etməyi də bacarasan. Cənab Prezidentin fərmanı oldu ki, çoxmənzilli binalara “kupça” verilsin, niyə bunlar həmin fərmana əməl etmək istəmirlər? Görün vəziyyət nə yerdədir ki, bütün bu binanın maddi məsul şəxsi kimi bir qarovulun adını rəsmiləşdiriblər. Bizim əlimizdə Vergilər Nazirliyindən verilən sənəd var. Həmin adam bütün günü “şlaqbaum”da durub maşınlardan 20 qəpik yığır. Bu adam necə maddi məsul şəxs ola bilər? Yüksək gərginlikli kabellərin keçdiyi şaxtalar çox bərbad vəziyyətdədir. Biz Fövqəladə Hallar Nazirliyinə müraciət etdik. Gəlib aktlaşdırdılar, şikayətimiz təsdiqini tapdı. Nə xeyri var? Heç bir addım atmırlar. Görün, bunlar nə dərəcədə özlərindən razıdırlar ki, bütün binanın lift sistemini kartla ediblər. Yəni siz kənardan mənim evimə qonaq gəlsəniz, ora qalxa bilməyəcəksiniz. Gərək mən düşüb sizi öz kartımla qaldıram. Bizim binada dializ xəstəsi olan Şirinova Tərgül yaşayır. Bir neçə gün əvvəl vəziyyəti pisləşib, təcili yardım çağırıb. Maşın bizim binaya 6 dəqiqəyə çatıb, amma xəstə xanımın mənzilinə 26 dəqiqəyə ancaq qalxa biliblər. Çünki xanım evdə təkdi deyə, kimsə düşüb kartı onlara verməyib ki, yuxarı qalxsınlar. Bu binada MTK sahiblərinin övladları yaşayır. Gedin onların da mərtəbəsinə baxın, mənim də. Onlar üçün muzey yaradılıb, digər sakinlərin mərtəbəsi isə sökülüb yerə tökülür. Bizim həyətdə qanunsuz bir bağça fəaliyyət göstərir. İqtisadiyyat Nazirliyindən sənəd almışıq ki, həmin bağçanın lisenziyası yoxdur. Buna baxmayaraq, onun üçün əlavə tikinti edib, 100 kvadrata yaxın ümumi istifadə üçün nəzərdə tutulan ərazini zəbt ediblər. Əlimizdə FHN-in aktı var ki, liftlər qəzalı vəziyyətdədir, istismarı dayanmalıdır. Buna da məhəl qoyan yoxdur. Bütün rəsmi qurumların qərarı var ki, həmin qanunsuz tikili sökülsün, yenə əməl edən yoxdur. Hər kvadratmetr üçün 30 qəpik kommunal ödəniş yığırlar. Bunun müqabilində heç bir sənəd və ya hesabat vermirlər. Zərrə qədər də olsun şəffaflıq yoxdur. Külli miqdarda pulun hara xərcləndiyindən əhali xəbərsizdir. Mənim özüm də bina yeni təhvil veriləndə burada bir il komendant işləmişəm. Sonra təhvil verdim. Belə adamlarla işləmək mümkün deyil”.

Sakinlər onların haqq səsini əlaqədar qurumlara çatdırmağımızı bizdən tələb etdilər.

Sözügedən binanın hazırda komendantı işləyən Xeyrulla Quliyev şikayətçilərin adından danışan Ağalar Cavadov adlı şəxsin dediklərinin həqiqət olmadığını bildirdi: “Ona sual verin görün son 78 ay ərzində 78 qəpik də olsun kommunal xidmət haqqı ödəyib? Bəs bu binanın problemləri hansı maliyyə ilə həll edilməlidir? Bütün günü lift işləyir, zibil daşınır, ağır nasoslar su vurur, bunlar məsrəf deyil? Bağçaya gəldikdə, cənab Prezidentin göstərişi var ki, çoxmənzilli binaların altında bağçalar olsun. Biz də ona uyğun davranırıq. Bağçanın olmağına 5 nəfər etiraz edirsə, 60 nəfər də İcra Hakimiyyətinə məktub göndərib, bunu təqdir edir. Deyir baseyn yuyulmur. Ondan soruşun görək, 3 il komendant işləyib, necə dəfə baseyn yudurdub? Gözünün qabağında mən ötən il baseyni təmizlədirdim. Bu da gedib ustalardan nə qədər pul aldıqlarını soruşurdu. Sonra “Azərsu”ya bu barədə şikayət etdi ki, guya mən sakinlərdən 900 manat alıb baseyn təmizlədirəm. Liftlərin kartla işləməsi bina sakinlərinin öz rahatlığı üçündür. Filtr, xlor satanlar qalxıb sakinlərin qapısını döyə bilmir. Liftlərlə bağlı isə irad “yamalara” tutulmuşdu, onu da aradan qaldırdıq. Ağaların peşəsi ancaq şikayət etməkdir. Amma adam gərək danışanda başının üstündə Allahını görsün, düz danışsın”.
Məhəmmədəli QƏRİB