Rəşad Cəbrayılov
Salyan Rayon İcra Hakimiyyətinin Başçısının müavini

Prezident İlham Əliyevin yürütdüyü siyasət nəticəsində Azərbaycan beynəlxalq müstəvidə güclü və nüfuzlu dövlət, ictimai-siyasi sabitliyin və davamlı inkişafın təmin olunduğu ölkə kimi tanınır. Ölkəmizin inkişafının, əldə etdiyi nailiyyətlərin əsasında uğurla, uzaqgörənliklə reallaşdırılan praqmatik daxili və xarici siyasət kursu dayanır. Azərbaycan artıq ən mühüm mövzuların müzakirə olunduğu mötəbər beynəlxalq tədbirlərin təşəbbüskarı və təşkilatçısı kimi tanınır. Xüsusilə 44 günlük Vətən müharibəsindən sonrakı dövrdə keçirilən beynəlxalq tədbirlərdə işğaldan azad olunan ərazilərimizin dirçəldilməsi və beynəlxalq nəqliyyat dəhlizlərinin mühüm komponentinə çevrilməsi istiqamətində görülən işlərin təbliğinə geniş yer verilir. Bu, həm də Prezident, Müzəffər Ali Baş Komandan İlham Əliyevin rəhbərliyi ilə Azərbaycanın Vətən müharibəsində qazandığı Qələbədən dərhal sonra dövlətimizin başçısının Cənubi Qafqazın sülh və əməkdaşlıq regionuna çevrilməsi istiqamətində həyata keçirdiyi ardıcıl və mütərəqqi siyasətə beynəlxalq ictimaiyyətin yüksək diqqətinin və artan marağının əyani ifadəsidir.

Cari ilin 3 may tarixində Şuşada Ümummilli Lider Heydər Əliyevin 100 illik yubileyinə həsr olunmuş “Böyük Avrasiya geosiyasətinin formalaşması: keçmişdən bu günə və gələcəyə” mövzusunda dördüncü beynəlxalq konfransın keçirilməsi xüsusi əhəmiyyət kəsb edirdi. Tədbirdə iştirak edən Azərbaycan Respublikasının Prezidenti İlham Əliyev hər zaman olduğu kimi ona verilən sualları cavablandırarkən mövcud reallıqları bir daha beynəlxalq aləmin diqqətinə çatdırdı. Prezident İlham Əliyev Şuşadan bəyan etdi ki, əgər Ermənistan sülh istəmirsə sülh olmayacaq: “Azərbaycan hələ də ümid edir ki, rəsmi İrəvan məntiqli davranacaq və sabiq Minsk qrupu fəaliyyətdə olanda işğal zamanı istifadə etdikləri taktikadan istifadə etməyəcəklər. Nəticə nöqteyi-nəzərindən 28 il ərzində Minsk qrupu heç bir nəticə verməmişdir. Bunun əsas səbəbi isə o idi ki, Ermənistan torpaqları geri qaytarmaq istəmirdi. Münaqişənin sülh yolu ilə həllini tapa bilməməsinin əsas səbəbi o idi, Ermənistan bunu istəmirdi. Onlar, sadəcə, bu taktikadan istifadə edirlər, prosesi ləngidirlər, bir addım irəli, iki, üç və ya hətta beş addım geriyə atırlar”
Dövlətimizin başçısı qeyd etdi ki, otuzillik işğal Ermənistana heç bir üstünlük vermədi. Əksinə, onlar regional inkişaf proseslərindən təcrid edildilər. Onlar rəsmən, lakin faktiki surətdə həqiqətən də müstəqil ölkə olmaq şansını itirdilər. Onlar indi özlərinə yeni ağa və ya ağalar axtarırlar.

Kommunikasiyaların açılmasına diqqət çəkən Prezident İlham Əliyev qeyd etdi ki, bu Ermənistanın da marağına xidmət edir. Onlar müxtəlif bazarlara çıxış əldə edə biləcəklər. Əlbəttə ki, bu, bizim üçün faydalı olacaq, çünki biz bu səhifənin bağlanmasını istəyirik.

Azərbaycan istər Vətən müharibəsinə qədər olan müddətdə, istərsə də müharibədən sonrakı dövrdə hər zaman sülh mövqeyindən çıxış edib. Postmünaqişə dövründə də Azərbaycan hər zaman bu sülh müqaviləsinin imzalanmasının önəmini vurğulayıb. Preizdent qeyd etdi ki, verilmiş bəyanatlara və hadisələrin xronologiyasına nəzər salınsa açıq şəkildə görünür ki, sülh sazişi haqqında danışıqların başlanılmasını təklif edən də Azərbaycan olmuşdur.

Dövlətimizin başçısı qeyd etdi ki, üçtərəfli Bəyanat atəşkəs razılaşması deyil. O, həmçinin sülh sazişi də deyil. Beləliklə, atəşkəsdən sonra nəyin baş verəcəyi böyük sual işarəsi idi. Biz təşəbbüs göstərdik, biz inteqrasiya olunmuş Cənub Qafqaz, regional əməkdaşlıq, münasibətlərin normallaşması üçün gələcəyə baxışı irəli sürdük. Buna görə biz sülh danışıqlarına başlamaq təşəbbüsünü irəli sürdük. Bütün istiqamətlərdən səs çıxmadı. Biz müəyyən vaxt gözlədikdən sonra tamamilə beynəlxalq hüququn norma və prinsiplərinə uyğun gələn beş prinsipi irəli sürdük.

ABŞ və Avropa İttifaqının rəsmiləri ilə çoxsaylı danışıqlarda Ermənistana və ABŞ-a tamamilə aydın idi ki, mövcud məsələdə ikiistiqamətli yanaşma olmalıdır. Birincisi, Ermənistan-Azərbaycan münasibətlərinin normallaşdırılması, ikincisi, Azərbaycan hökuməti və Qarabağın erməni icması ilə danışıqlar. Buna görə də sülh sazişinin mətninə mövcud olmayan qondarma “Dağlıq Qarabağ Respublikası”nı salmaq üçün istənilən cəhd qeyri-məhsuldardır. Əgər rəsmi İrəvan konstruktiv olmasa, Azərbaycan diplomatik tədbirlərdən başqa hər hansı bir digər tədbirlərə əl atmağı planlaşdırmır. Bu qədəri bizə bəsdir. Buna görə, sadəcə, sülh olmayacaq, kommunikasiyalar açılmayacaq. Ermənistan yenə də təcrid olunacaq.

Prezident İlham Əliyev Şuşa konfransında suallar ətrafındakı çıxışında Azərbaycanın uğurlarını, gələcək planlarını və eyni zamanda, müharibədən sonrakı dövrə baxışını ifadə etdi. Avropanın enerji təhlükəsizliyinin təmin edilməsində əsas aktorlardan biri olan Azərbaycan bu baxımdan yeni siyasi imkanlar əldə edib. Azərbaycan bu imkanlardan istifadə edərək regionda sülhün bərqərar olması və regional iqtisadi inkişafı təmin etmək istəyir.
Şuşa konfransında xarici ölkələrin beyin mərkəzlərinin və ekspertlərinin iştirakı, eyni zamanda, onların regionla bağlı həqiqətləri bir daha eşitmələri xüsusi əhəmiyyət kəsb edirdi. Dahi şəxsiyyətin 100 illik yubileyinə həsr olunmuş beynəlxalq konfransda aparılan müzakirələr, Prezident İlham Əliyevin cavabları Azərbaycanın möhkəm təməl üzərində böyük uğurlara, qələbələrə doğru inamla irəlilədiyini bir daha təsdiqlədi.