Afrikadan su yolu ilə Avropaya keçmək istəyən çoxdur. Xüsusilə Liviyadan bu qitəyə çoxlu miqrant gəlir.
Bizimyol.info xəbər verir ki, məhz bu ölkədən olan miqrantlar dənizdə boğulmaq təhlükəsi zamanı köməyə gələn gəmini qaçırıb. Liviyalılar gəmini Aralıq dənizində ələ keçirib. “Elhiblu-1” tankerinə 108 nəfər sığışıb. Gəmidə yerləşəndən sonra miqrantlar onların Liviyaya qaytarılması planından xəbər tutan kimi fəaliyyətə keçiblər. Gəmi heyətini Maltaya yön almağa məcbur ediblər. Heyətin hansı vəziyyətdə saxlanılması, nə dərəcədə həyatlarına təhlükə olması haqda məlumat yoxdur.

Malta hökuməti faktı təsdiq edib. Amma əlavə ediblər ki, miqrantlara sahilə yaxınlaşmağa imkan verməyəcəklər. İtaliyanın baş naziri Matteo Salvini də liviyalıların hərəkəti barədə sərt danışıb. Deyib ki, onların Avropaya keçməsinə yol verilməyəcək: “Bunlar bəla ilə üzləşən miqrantlar deyil, quldurlardır. Onlar İtaliyanı yalnız teleskopla görə bilərlər”.

Keçən ilin dekabrında miqrantlar Böyük Britaniyada gəmini ələ keçirməyə çalışmışdılar. Dörd afrikalı İtaliya gəmisinə biletsiz yol tapmışdı. Gəmi Temza çayına yaxınlaşanda şəxsi heyətdən onları quruya çıxarmağı tələb etmişdilər. Onda xüsusi təyinatlılar afrikalıların arzusunu gözündə qoymuşdu. Onları ələ keçirmişdilər.