Bərdədə 13 yaşlı uşağın enerji içkisi qəbul edəndən sonra ölməsi faktı təsdiqlənməyib.

Səhiyyə Nazirliyinin mətbuat xidmətindən bildiriblər ki, rayonun Dəymədağıldı kənd sakini, 2006-ci il təvəllüdlü Şamil Namiq oğlu Babazadə enerji içkisindən deyil, onkoloji xəstəlikdən dünyasını dəyişib. "Uşaq enerji içkisi qəbul edib, buna görə də, yaxınları vəziyyətinin pisləşməsini bununla əlaqələndiriblər", - nazirlikdən qeyd olunub.

Verilən məlumata görə, Şamil fevralın 26-da ağır vəziyyətdə Bərdə Birləşmiş Uşaq Xəstəxanasına gətirilib.

Xəstənin müayinəsi zamanı rentgenoqrafiyada ilkin olaraq "Soltərəfli plevropnevmaniya, ağciyərin emfizeması" diaqnozu qoyulub. Uşağa göstərilən tibbi yardıma baxmayaraq, onun vəziyyəti dəyişməyib, buna görə də, həkim nəzarətində Bakıdakı Respublika Klinik Uşaq Xəstəxanasına gətirilib, reanimasiya şöbəsinə yerləşdirilib. Bundan sonra döş qəfəsinin KT müayinəsi edilib, ona "Sağ ağciyərin orta payının şişi, ağciyər emfizeması, hematoraks, hər iki ağciyərdə plevropnevmaniya" diaqnozu qoyulub. Ş.Babazadə Təcili Yardım Xəstəxanasının uşaq cərrahiyyəsi şöbəsinə köçürülüb. Uşaq həmin şöbəyə daxil olduğu qısa müddət ərzində vəfat edib.(virtualaz.org)