Xeber.info-un baş redaktoru Lamiyə Əliqızı bildirir ki, Azərbaycanın ictimai-siyasi və mədəni salnaməsində elə parlaq simalar var ki, onların həyat amalı hər zaman xalqa xidmətə, xeyirxahlığa və mənəvi ucalığa söykənir. Bu uca zirvədə dayanan Mehriban xanım Əliyeva müstəqil Azərbaycanın humanitar simasını formalaşdıran müstəsna şəxsiyyətdir.

Mehriban xanımın çoxşaxəli fəaliyyəti heç vaxt hüdudlu çərçivələrə sığmır. Dövlətçilik təfəkkürü ilə ictimai təşəbbüslərin vəhdəti onun hər bir addımında aydın hiss olunur. Onun adı çətinə düşənlərin ümid ünvanına, cəmiyyətə işıq saçan xeyirxahlıq simvoluna çevrilib.

İnsan amilinin hər şeydən uca tutulduğu bu fəaliyyət trayektoriyasında həssas kateqoriyadan olan insanlar – uşaqlar, aztəminatlı ailələr, şəhid ailələri və qazilər, eləcə də sağlamlıq imkanları məhdud olanlar hər zaman diqqət mərkəzindədir. Heydər Əliyev Fondunun rəhbəri kimi Mehriban xanımın birbaşa təşəbbüsü ilə ölkə miqyasında inşa olunan və yenidən qurulan məktəblər, bağçalar, səhiyyə və mədəniyyət ocaqları bu nəcib missiyanın əyani sübutudur. Görülən hər bir iş, reallaşan hər bir layihə vətəndaşların sosial rifahına, gələcəyin isə daha etibarlı təməllər üzərində qurulmasına xidmət edir.

Bu tükənməz qayğıkeşlik yalnız ölkə daxili ilə məhdudlaşmır. Mehriban Əliyevanın təşəbbüsləri beynəlxalq müstəvidə də Azərbaycanın humanist dəyərlərə bağlılığını, mərhəmət və həmrəylik prinsiplərini bütün dünyaya tanıdan mühüm körpüdür.

Böyük layihələrin və tarixi təşəbbüslərin arxasında dayanan əsas dəyər səmimiyyət, insana dərin sevgi və sabahın daha aydın olması istəyidir. Məhz bu səbəbdən xalq arasında ona bəslənən sonsuz sevgini və onun xeyirxahlıq yolunu poetik şəkildə “Mərhəmət İlahəsi” adlandırmaq tamamilə haqlıdır. Çünki mərhəmət sözlə deyil, illərlə görülən böyük əməllər, nümayiş etdirilən nəcib davranışlarla ölçülür.

Bu gün Mehriban xanım Əliyevanın həyata keçirdiyi hər bir xeyirxah əməl cəmiyyətimizdə həmrəylik və humanizm duyğularını daha da möhkəmləndirir. Bu fəaliyyət gələcək nəsillərə unudulmaz bir həqiqəti – insana edilən hər bir yaxşılığın bütövlükdə cəmiyyətə inam və işıq bəxş etdiyini hər an xatırladır.